Қазақстанда 2016 жылдан бастап GMP стандарттарына сәйкес дәрілік заттардың жалпы нарығы қалыптасады

Қазақстанда 2016 жылғы 1 қаңтардан бастап GMP стандарттарына сәйкес дәрілік заттардың жалпы нарығы қалыптасады, деп хабарлады ҚР Денсаулық сақтау және әлеуметтік даму министрлігінің баспасөз қызметі.

«Қазақстанда 2016 жылғы 1 қаңтардан бастап дәрілік заттардың тиісті фармацевтикалық тәжірибесі (GMP) стандарттарына сәйкес дәрілік заттардың жалпы нарығы қалыптасады. Бұл 2014 жылғы мамыр айында Мемлекет басшылары қол қойған Еуразиялық экономикалық одақ туралы келісімшартта айқындалған», - делінген хабарламада. 

Осы мерзімге дейін ЕАЭО аумағындағы дәрілік құралдар айналымына қойылатын бірегей талаптар және ортақ шарттар жасалады. Ол үшін нормативтік-құқықтық актілер, оның ішінде еуропалық талаптарға үйлестірілген тиісті фармацевтикалық тәжірибе ережелері әзірленіп, қабылдануы тиіс. 

Еске сала кетейік, 2014 жылы жаңа тетіктер бойынша отандық тауар өндірушілермен медициналық препараттарды жеткізу жөнінде ұзақ мерзімді келісім-шарттар жасауға байқау өткізіліп, нәтижесінде 13 жаңа ұзақ мерзімді келісім-шартқа қол қойылды. Бұған дейін 471 түрлі дәрілік құралды жеткізу жөнінде ұзақ мерзімді 7 келісім-шарт болғанын ескерсек, жалпы алғанда 18 отандық тауар өндірушімен 7 жыл мерзімге жасалған 20 келісім-шарт жұмыс істейді.

Тұрғындарды қауіпсіз және сапалы медициналық препараттармен қамтамасыз ету және еуропалық талаптарға сәйкестендіру мақсатында 2014 жылғы 17 наурыздан бастап GMP жағдайында өндірілмеген шетелдік дәрілік құралдарды мемлекеттік тіркеуге тыйым салынған болатын. Бұл норма отандық дәрілік құралдарды өндірушілерге қатысты 2018 жылғы 7 қаңтардан бастап күшіне енеді.